Updates from செப்ரெம்பர், 2007 Toggle Comment Threads | விசைப்பலகை சுருக்கவிசைகள்

  • சத்யராஜ்குமார் 10:48 am on September 24, 2007 நிரந்தர பந்தம் | மறுமொழி  

    மெய்ப்பொருள் 

    சின்னஞ்சிறு குழந்தைகளை “வீட்டுக்குப் போலாம் ! ” என்று நச்சரிக்காமல்  நான்கு மணி நேரம் கோயிலில் உட்கார வைக்க முடியுமா ? முடிந்தது. வாஷிங்டன் டிஸி பகுதியில் பத்தொன்பது வருடங்களாய் இயங்கி வரும் பால விகாஸ் அதை சாதித்துக் காட்டுகிறது. லார்ட்டன் வட்டார துர்க்கா கோயிலின் நிர்வாகக் குழுவைச் சேர்ந்த திரு. ஷண்முகசுந்தரம் அளித்த தகவலின் பேரில் அகிலைக் கூட்டிக் கொண்டு சென்றிருந்தேன். வினாயகர் சதுர்த்தி நிறைவு விழா பூஜை.  

    பால விகாஸின் எந்தவொரு நிகழ்ச்சியிலும் குழந்தைகளே செயல் வீரர்கள். சாதி பேதமின்றி அனைத்து குழந்தைகளும் பங்கு பெற்று ஆகம முறைப்படி பிள்ளையாருக்கு பூஜை நடத்தினார்கள். ஒவ்வொரு சடங்கிற்கும் பின்னணியில் உள்ள தாத்பர்யத்தை அவர்களே விளக்கினார்கள். முழு நிகழ்ச்சியையும் தொகுத்து வழங்கியதும் குழந்தைகள்தான்! பெரியவர்கள் சும்மா உதவிக்கு மட்டுமே !

    ஸ்ரீ ராமகிருஷ்ண பரமஹம்ஸரின் நேரடி சிஷ்யரை குருவாகக் கொண்ட சுவாமி ஸ்வஹானந்தாஜி வந்திருந்து குழந்தைகளுக்கு ஆசியும், அறிவுரையும் வழங்கினார். ஹிரானந்தா என்னும் இன்னொரு துறவி குழந்தைகளுக்கு அவர்களுக்குப் பிடித்த Nintendo போன்ற நவீன விஷயங்களை தொடர்பு படுத்தி வெகு சுவாரஸ்யமாய் உபதேசம் செய்தார்.

    துறவிகளிடம் எனக்கு அதிக ஈடுபாடு இல்லை எனினும், அவர்கள் அளிக்கும் உபதேசங்களின் மெய்ப்பொருள் காண்பதில் எப்போதுமே ஆவல் உண்டு.

     
  • சத்யராஜ்குமார் 7:28 am on September 23, 2007 நிரந்தர பந்தம் | மறுமொழி  

    வெள்ளை 

    என்னை அறியாமல் கண்களில் நீர் திரண்டது. பிரமிப்பில் அப்படியே மண்டியிட்டு அமர்ந்து விட்டேன். இருபது வருடங்களுக்கு முன்பு முதன் முதலில் தாஜ்மஹாலை நேரில் பார்த்ததும் ஏற்பட்ட உணர்வைத்தான் சொல்கிறேன். எத்தனை படங்களில் பார்த்திருந்தாலும் சரி, எத்தனை பேர் எத்தனை விதமாய் அதைப் பற்றி சிலாகித்திருந்தாலும் சரி. அதன் சரித்திரத்தையும், பின்னணியையும், அறிவுஜீவ சிந்தனைகளையும் சுத்தமாய் மறந்து விட்டு, உங்கள் முன்னால் நிற்கும் நிதர்சனம் என்று அதன் பிரம்மாண்டத்தையும், அற்புதமான கலை நயத்தையும் பார்த்தால், அதனிடம் ஒரு இன்ப அடி நிச்சயம் வாங்குவீர்கள். 

    அத்தனை அழகான தாஜ்மஹால் அப்போதே, ஃபாரிதாபாத் தொழிற்சாலைகளால் மாசடைந்து வெள்ளை நிறம் மங்கி மஞ்சள் பூத்திருந்தது. அங்கு சென்ற அனுபவத்தையும், அது மாசடைந்து வரும் அபாயத்தையும் முடிச்சிட்டு ‘வேறு திசைகள்’ இலக்கிய இதழில் ஒரு சிறுகதை எழுதியதாய் ஞாபகம். இப்போது தாஜ்மஹால் எப்படி இருக்கிறதென்று சமீபத்தில் பார்த்தவர்கள்தான் சொல்ல வேண்டும்.

    நேரில் பார்த்திருந்தாலும், பார்க்காவிட்டாலும் தாஜ்மஹால் நம்மவர்களிடையே ஏற்படுத்தியிருக்கும் தாக்கத்தினால் எனக்கு இப்போதெல்லாம் மிக மெல்லிய ஒரு பிரச்சனை. தலைநகர் அருகே வசிப்பதால் அவ்வப்போது யாரையாவது கூட்டிக்கொண்டு போய் வெள்ளை மாளிகையைக் காண்பிக்க நேர்கிறது. முதன் முதலாய் அதைப் பார்க்க வரும் நம்மவர்கள் வெள்ளை மாளிகையை ஏதோ தாஜ்மஹால் ரேன்ஜுக்கு கற்பனை செய்து கொண்டு வந்து ஏமாந்து போகிறார்கள். ” அய்யே, புரவிபாளையம் ஜமீன் மாளிகை இதை விட பெரிசா இருக்குமே ! ” என்று அசடு வழிகிறார்கள்.

    அதிபரின் வீட்டை மாளிகை என்று தமிழ்ப்படுத்தியிருப்பதாலா ?

     
  • சித்ரன் ரகுநாத் 7:19 am on September 22, 2007 நிரந்தர பந்தம் | மறுமொழி  

    டிஜிட்டல் வாழ்வு 

    ஒவ்வொருவர் வீட்டிலும் கருப்பு வெள்ளைப் புகைப்படங்களுடன் கூடிய ஏதாவதொரு ஆல்பம் நிச்சயம் இருக்கும். தாஜ்மஹால், மோட்டார் பைக், பிருந்தாவன் கார்டன் இப்படி ஏதாவது backdrop-ன் முன் நின்றபடி ஃபோட்டோகிராபரைப் பார்த்து சிரித்துக் கொண்டிருப்பார்கள். தவறாமல் ஆண்கள் கோட் சூட் அணிந்து, பெண்கள் கைகளிலும் கொஞ்சம் தவழவிட்ட பெரிய முந்தானையுடன், எண்ணை போட்டு சரியாய் வகிடெடுத்த தலையுடன் ஸ்டுடியோ பெளடரின் உபயத்தில் கேமராவில் கருப்பு போர்வை போர்த்தி எடுத்த புகைப்படத்தை நிறைய பேரின் ஆல்பத்தில் பார்த்திருக்கிறேன். ஃபோட்டோ ஸ்டுடியோவையெல்லாம் தாண்டின் இன்ன பிற கருப்பு வெள்ளைப் புகைப்பட அனுபவ விவரணைகளையும் இப்படி நிறைய சொல்லிக்கொண்டே போகலாம்.

    அப்பொழுதெல்லாம் ஃபோட்டொ எடுத்துக் கொள்வதென்பதுகூட எப்போதாவது நடக்கும் அபூர்வமான சந்தோஷமான விஷயம்! இந்த புகைப்படங்கள் மஞ்சளாகிப் போய் ஓரங்கள் கொஞ்சம் பூசனம் பிடித்து சிதிலமடைந்திருந்தாலும் என்றைக்காவது எடுத்துப் புரட்டினால் வரலாறு கலந்த இதமான உணர்வு வரும்.

    டிஜிட்டல் கேமரா வந்துவிட்டது. கேமரா மொபைல் வந்துவிட்டது. அப்புறம் காம்கார்டர் இன்னபிற எல்லாமே பாக்கெட்டுக்கு அடக்கமாய் சகாய விலையில் கிடைக்கின்றன. பெண்டாட்டி, குழந்தைகள், போன இடம், வந்த இடம் என்று பார்த்ததையெல்லாம் இஷ்டப்பட்டபடி இஷ்டப்பட்ட நேரத்தில் கிளிக்க முடிகிறபடியால் உலக மக்களில் முக்கால்வாசிப் பேர் இப்போது ஃபோட்டோகிராபர்கள் ஆகிவிட்டார்கள். விளைவாக Flickr மாதிரி வலைத்தளங்களில் கோடிக்கணக்கான புகைப்படங்கள் கொட்டிக் கிடக்கின்றன. நான் தனியொருவனாக Sony Ericsson உபயோகித்துக் கிளிக்கினது மட்டும் ஆயிரக் கணக்கில் இருக்கிறது. என் கணினி ஃபோல்டர்களில் தினமும் மலையாய்க் குவியத் தொடங்கிவிட்டன டிஜிட்டல் புகைப்படங்கள்.

    இவற்றை நிர்வகிக்க வாரத்துக்கு அரை மணி நேரம் தேவைப்படுகிறது. வாழ்க்கையை எளிமையாக்குகிறேன் பேர்வழி என உள்ளே நுழைந்த இமெயில், காமிரா, காலண்டர் போன்ற டிஜிட்டல் நுட்பங்கள் உண்மையில் வாழ்க்கையை மேலும் சிக்கலாக்குகின்றன.

     
c
Compose new post
j
Next post/Next comment
k
Previous post/Previous comment
r
மறுமொழி
e
தொகு
o
Show/Hide comments
t
Go to top
l
Go to login
h
Show/Hide help
shift + esc
நிராகரி