வாஷிங்டனில் காதுகுத்து

நூற்றுக் கணக்கில் சுற்றம் சூழ குல தெய்வம் கோயிலில் தென்றலுக்கு ஆகஸ்ட்டில் நடந்த காது குத்து வைபவம் சென்ற இரு பதிவுக்கு முந்தைய பதிவை கவனமாய்ப் படித்திருந்தால் தெரிந்திருக்கும். அது வெறும் வைபவம் அல்ல; பெரிய களேபரம் என்பது கீழே உள்ள புகைப்படம் பார்த்தால் புரியும்.

 

இந்தியாவில் காதுகுத்து

பலியாடு மாதிரி கூட்டத்தைப் பார்த்து மிரண்டு போயிருந்த தென்றலுக்கு ஒரு காது குத்துவதே பெரும்பாடாயிருந்திருக்க, மறு காது குத்துவதற்குள் ஆசாரி முதல் அத்தனை பேரும் ஆடிப் போய்விட்டார்கள்.  அடுத்த அரை மணி நேரத்திலிருந்தே அவள் தன் தோடைப் பிடித்து இழுப்பதும், வலியில் அழுவதுமாய் இருந்ததில் அடுத்த நாள் காலையில் இரண்டு காதுகளிலும் ரத்தக் காயம். தோடுக்கு பதிலாக வேப்பங்குச்சி சொருகச் சொன்னார்கள் வீட்டுப் பெரியவர்கள். மூன்றே நிமிஷங்களில் குச்சி மாயமாகி விட, தயவு செய்து நடந்த காதுகுத்து சம்பவங்களை மறந்து விடுமாறு எல்லோரையும் நான் கெஞ்சி கேட்டுக் கொண்டேன். நாலாம் நாள் ஓட்டை அடைபட்டுப் போக, காதுகுத்திய சுவடே இல்லாமல் அமெரிக்கா திரும்பி வந்தாள் தென்றல்.

போன வாரம் ஷாப்பிங் மால் வளாகம் சென்ற போது, எதேச்சையாய் இந்த அறிவிப்புப் பலகை பார்த்தோம்.

 

இங்கு இலவசமாய் காதுகுத்தப்படும்

நாள் நட்சத்திரம் பார்க்காமல் வாஷிங்டனில் காதுகுத்துக்கு உடனடி முடிவு எடுக்கப்பட்டது. அதன் பிறகு நடந்ததெல்லாம் கீழே படங்களில் !

 

இந்தியாவில் நடந்த காதுகுத்து சம்பவங்களை கேட்டுவிட்டு, இந்தக் குட்டிப் பிசாசுக்கு எப்படி குத்தப் போகிறேனோ என்று மலைக்கிறார் காது குத்து நிபுணி.

முன்னேற்பாடுகள் ஆரம்பம்.

காது குத்த வேண்டிய இடம் குறி பார்க்கப்படுகிறது

 

 

 

 

 

 

 

 

மருந்து தடவி இரண்டுபேர் ஆளுக்கொரு காதில் ஸ்டாப்லர் போன்ற கருவியைப் பிடித்துக் கொண்டு, "Ready Set Go", ஏக காலத்தில் இரண்டு காதுகளிலும் ஸ்டாப்லரை ஒரே ஒரு அமுக்கு.

 

ஆர்ப்பாட்டம் ஏதுமில்லை. அப்படி ஏதும் அழுகை இருந்தால் அடைப்பதற்கு வாழைப்பழத்துக்கு பதிலாக லாலிபாப்.

 

இடதும் ...

வலதும் ...

 

 

 

 

 

 

 

இனிதே மின்ன… காது குத்து சுபம் !

Advertisements

NJ சந்திப்பு

எழுத்தாளராக முயன்று வந்த போது, இலக்கிய கூட்டங்களுக்கெல்லாம் செல்லும் பழக்கமில்லாமல் சில நுட்பங்கள் அறியாமல் போனேன். தற்சமயம் வலைப்பதிவராகும் முயற்சியில் மேற்படி தவறு நடந்து விடக்கூடாதென நாலு மணி நேரம் பயணித்து NJ சென்று வந்தேன்.

அறிந்த பெயர்கள். அறியாத முகங்கள். மசாலா உணவகத்தில் நடந்த மசாலா சந்திப்பு. Buffet ஸ்டைலில் எல்லா டாபிக்கையும் தொட்டுச் சென்று கொண்டிருந்தார்கள். ஒரு சிலது சற்று காரசாரமாக இருந்தாலும், பொதுவாக எல்லா அயிட்டங்களும் சுவையாக இருந்தன. 

வாசகர்கள், வலைப்பதிவர்கள் என்ற இரண்டு லேபிள்களில் அங்கே நபர்கள் இருந்தார்கள். சந்தித்தவர்கள் பற்றியும், பேசியது பற்றியும் விளக்கமாக வேறு சில இடங்களில் காணக்கூடும். 

எழுத்தாளர்கள் சந்தித்துக் கொண்டால் வாசகர்கள் குறித்து என்ன பேசிக் கொள்வார்கள் என்று தெரியும். வாசகர்கள் சந்தித்துக் கொண்டால் எழுத்தாளர்கள் குறித்து என்னவெல்லாம் பேசுவார்கள் என அன்று அறிந்தேன்.

வளரும் எழுத்தாளர்கள் மற்றும் வலைப்பதிவர்களுக்கு உபயோகமானவை. அதைப் பற்றி இங்கே எழுதப் போவதில்லை. அப்போதுதான் அடுத்த சந்திப்புக்கு இன்னும் கொஞ்சம் கூட்டம் கூடும் !