Updates from ஏப்ரல், 2011 Toggle Comment Threads | விசைப்பலகை சுருக்கவிசைகள்

  • காஞ்சி ரகுராம் 7:19 am on April 5, 2011 நிரந்தர பந்தம் | மறுமொழி
    Tags: அணு மின்நிலையம், அபாயம், கதிர் வீச்சு, கல்பாக்கம், , கூடங்குளம், , ஜப்பான், பாதுகாப்பு   

    கல்பாக்கம் அணு மின் நிலையம் பாதுகாப்பானதா? 

    கல்பாக்கம் அணு மின் நிலையம்

    கான்கிரீட் கலவையைக் கொட்டியாவது அணுவின் கதிர்களைக் கட்டுப்படுத்த ஜப்பான் நினைக்கிறது. திறமைக்கும், உழைப்பிற்கும், அரசு விசுவாசத்திற்கும் பெயர் பெற்ற ஜப்பானிற்கே இக்கதியென்றால்… நமது கூடங்குளம், கல்பாக்கத்தின் நிலை? அதுவும் நாம் கண்ட சுனாமியின் ரணங்கள் இன்னமும் ஆறாத போது? ஒரு சாமான்ய மனிதனாய் என் மனமும் சலனப்பட்டது.

    சமீபத்தில் என் உறவினர் வீட்டிற்குச் சென்றபோது நடந்த ஒரு சிறு சம்பவம் என் சலனத்தை கடலாக்கியது.

    அது ஒரு இளங்காலை.

    பக்கத்து நகரிலிருந்து வரப்போகும் பேப்பர் பையனுக்காக, வாசல் திண்ணையில் கால்நீட்டி அமர்ந்திருந்தேன். அன்றைய தின சுழற்சிக்கு அக்கிராமம் தயாராகிக் கொண்டிருந்தது. பொதியிழுக்க தினவெடுத்து சில காளைகள் செல்ல, அதைத் தொடர்ந்து ஒரு வாத்துக் கூட்டம் தன்னொலிகளை ரம்மியமாக எழுப்பியபடி நகர்ந்தது.

    ஆஹா, இன்று இயற்கையை ரசிக்க வாய்த்திருக்கிறது. விழிகளைச் சுழலவிட வேண்டியதுதான் என எண்ணியபோது என் பார்வை, வாசல் தூணில், திருஷ்டி பொம்மைக்கு அருகில் தொங்கிக் கொண்டிருந்த ஒரு வஸ்துவில் தட்டுப்பட்டு நின்றது.

    அது மூணங்குல சதுர வெள்ளை வஸ்து. அழகாக லேமினேட் செய்யப்பட்டு ஒரு தடிமனான நூலில் தொங்கிக் கொண்டிருந்தது. கிட்டதட்ட ஐ.டி கம்பெனியின் ஆக்ஸெஸ் கார்டு மாதிரி இருந்தது.

    அட இது என்ன? திருஷ்டி பொம்மைக்குக் கூட ஆக்ஸெஸ் கார்டு கொடுக்கிறார்களோ?! எனக் குசும்பாய் நினைக்கும்போதே, வாசலில் ஒரு ஜீப் வந்து நிற்க, அதிலிருந்து இரண்டு அதிகாரிகள் இறங்கினர். ஐயோ, சிபிஐ இங்கேயும் வந்து விட்டதோ எனத் திகிலடைந்தேன். சேச்சே… இப்போ கடந்து சென்ற வாத்தைவிட நாம்தான் அப்பிராணியாச்சே எனத் தெளிந்து, அவர்களை முறுவலித்து வரவேற்றேன்.

    பதில் முறுவல் தந்த அவர்கள், நேராக அந்த வஸ்துவிடம் சென்று, வேறேதோ கருவி கொண்டு அதை உற்று நோக்கினர். பின் அதை எடுத்துக் கொண்டு, அதற்குப் பதிலாக புதியதொன்றை மாட்டி விட்டனர். அப்போது என் உறவினர் அவ்விடம் வர, ஒருவர் அவரை நலம் விசாரித்து தான் கொண்டு வந்த கேனில் எங்கள் வீட்டு கிணற்று நீரை பெற்றுக் கொண்டார். மற்றவர் அக்கம்பக்க வீடுகளுக்குச் சென்று, கீரை, கத்திரிக்காய், வெண்டைக்காய் ஆகியவற்றை பெற்றுக் கொண்டு வந்தார்.

    ‘அட, என்னதான் நடக்கிறது இங்கே?’ என நான் குழம்பிய போது, ஜீப்பின் முகப்பில் தென்பட்ட வாசகம்: கல்பாக்கம் அணு மின் நிலையம்.

    அவர்கள் புறப்பட்டதும் உறவினர் விளக்கினார். “காத்துல அணுவோட ரேடியேஷனை பதிவு செய்யும் கருவி அது (அந்த வஸ்து). மாசம் ஒருவாட்டி காத்துல, தண்ணில, இங்கே விளையறத வெச்சு மண்ணுல அணுவோட ரேடியேஷனை கணக்கிடுகிறார்கள்…” அவர் சொல்லச் சொல்ல என்னுள் ஓராயிரம் அணுக்கள் வெடிக்கத் தொடங்கின.

    கூவக்கரை வீட்டின் கொசுக்களைப் போல, அணுவின் கதிர்கள் எப்போதும் நம்மை சுற்றிச் செல்கின்றனவா? சரியாக இயங்கும் நிலையிலேயே இப்படி என்றால்? அணு உலையின் திசையில் சுனாமி சீறினால் இக்கிராமத்தின் கதி? கல்பாக்கத்திலிருந்து 50 கிலோமீட்டர்கள் தள்ளியிருக்கும் இவ்விடத்தையே கதிர்கள் கைவீசி கடக்கின்றன என்றால், இடைப்பட்ட இடங்களின் கதி? நினைக்கவே முடியவில்லை. இன்னொரு தசாவதாரக் கதையை ஆக்கவோ, பார்க்கவோ அணு விட்டு வைக்காது.

    சுற்றும் பூமியின் வெளியில், வளி மட்டும் சுற்றிய காலம் டைனோசர்கள் வாழ்ந்த நாட்கள் மட்டும்தானா? இன்று இப்பாதுகாப்பற்ற நிலை ஏன்?

    மனிதனின் பெருகி விட்ட தேவைகளால், விஞ்ஞானமயமாக்கல் எல்லைகளைக் கடந்து விட்டது. அண்டத்தின் கதிர்களிடமிருந்து காத்த ஓசோனை ஓட்டை போட்டதோடு மட்டுமல்லாமல், உள்ளிருந்தே கணக்கற்ற கதிர் வீச்சுகளுக்கு அடிகோலிவிட்டது அறிவியல்.

    கோடிக்கணக்கான உயிரினங்கள் ஆனந்தமாக வாழ, அனைத்து வளங்களுடன் படைக்கப்பட்ட பூமி அறிவியலால் மாசடைந்ததில், பல இனங்கள் என்றோ மடிந்து விட்டன. மனித இனமும் அக்கதி நோக்கியே.

    அணுவைத் துளைத்து ஏழு கடல்களைப் புகுத்தி… அன்று பாட்டி சொன்னது, இன்று விபரீதமாய்த் தொணிகிறது.

     
    • கீதப்ப்ரியன்|geethappriyan 11:50 முப on ஏப்ரல் 5, 2011 நிரந்தர பந்தம் | மறுமொழி

      மிகவும் உண்மை
      நமது பெருகிவிட்ட தேவைகளுக்காக சுற்றுப்புறத்தை குப்பைக்காடாக்கியதன் பலன் தான் அது.கேன்சர் கல்பாக்கம் என்றே அழைக்க துவங்கிவிட்டனர்.
      http://ravittp.blogspot.com/2008/09/blog-post_9389.html

    • கீதப்ப்ரியன்|geethappriyan 12:07 பிப on ஏப்ரல் 5, 2011 நிரந்தர பந்தம் | மறுமொழி

    • வலிபோக்கன் 7:56 முப on ஏப்ரல் 6, 2011 நிரந்தர பந்தம் | மறுமொழி

      போபால் விஷவாயு வந்தபோதே.எங்களால் ஒன்னும் செய்யமுடியல.இனி மேலுமா சுதாரிக்கபோறோம்

    • நெல்லி. மூர்த்தி 8:57 முப on ஏப்ரல் 6, 2011 நிரந்தர பந்தம் | மறுமொழி

      என்று ஜப்பான் அணு மின் நிலையத்திற்கு சிக்கல் அன்றே நாம் நமது கல்பாக்கம் உள்ளிட்ட அனைத்து அணு மின் நிலையப் பாதுகாப்புக் குறித்து ஐயப்படவேண்டி உள்ளது. இது போன்ற சிக்கலுள்ள விஷயத்திற்காகவா கம்யூனிஸ்டுகளைப் பகைத்துக் கொண்டு அமெரிக்காவுடன் மன்மோகன் அரசு குறியாக இருந்தது? கம்யூனிஸ்டுகளின் போக்கினால் தான் ஏனோ நாடே பின் தங்கியுள்ளது போல ஒரு மாயை உருவாக்கி அவர்களை சாடினார்கள். நமது அரசியல்வாதிகளாகட்டும், அதிகாரிகளாகட்டும், ஆளும் வர்க்கத்திற்கு தலையாட்டுவதில் தான் ஆர்வம் காட்டுகின்றனரே தவிர, விளைவின் தன்மையைக் குறித்தோ, விழிப்புணர்வோ போதுமான அளவில் இல்லை என்பதே உண்மை.

  • சத்யராஜ்குமார் 9:04 pm on September 5, 2010 நிரந்தர பந்தம் | மறுமொழி
    Tags: கணிதம், Math   

    கர்ணம் 

    நண்பர் பாஸ்கரனை நேற்று சந்தித்தேன். பொறியியல் பேராசிரியரான அவருக்கு கணிதத்தில் அலாதி ஈடுபாடு. அகிலிடம் அவனது 7th கிரேடு கணிதம் பற்றி விசாரித்தவர், அவன் பித்தாகரஸ் தியரம் பற்றி சொன்ன போது அதை நிறுவிக்காட்டுமாறு கேட்டார். செங்கோண முக்கோணத்தின் பக்கங்கள் a மற்றும் b எனில், அதன் கர்ணம் c -ஐ கண்டறிய உதவும் கீழ்க்கண்ட சமன்பாடு பித்தாகரஸ் என்னும் கணித மேதை நிறுவியது.

    a2 + b2 = c2


    நான் படிக்கிற காலத்தில் இதை அப்படியே உருப்போடச் சொல்லி விட்டார்கள். ஆனால் அகிலுக்கு அப்படி இல்லை. அவனால் கீழே உள்ள படம் போல வரைந்து உடனே அதை நிறுவிக்காட்ட முடிந்தது.


    தொடர்ந்து பாஸ்கரன் செங்கோண முக்கோணத்தின் கர்ணம் என்னும் hypotenuse-ஐ கண்டறிய பல வழிகள் இருப்பதாகவும், அவற்றில் ஒன்று நம் பழந்தமிழர் கண்டு பிடித்தது என்றும் சொன்னார். சில ஆயிரம் வருடங்களுக்கு முந்தைய இந்தத் தமிழ்ப்பாடலில் அந்த வழி முறை சொல்லப்பட்டுள்ளது.

    ஓடிய நீளந்தன்னை ஓரெட்டு கூறதாக்கி கூறிலே ஒன்று தள்ளி
    குன்றத்தில் பாதி சேர்த்தால் வருவது கர்ணம் தானே.

    ( a – (a/8) ) + (b/2) = c

    என்பதே அந்தப் பாடல் சொல்லும் சமன்பாடு. நீளமான பக்கத்தை எட்டாய்ப் பிரித்து, அதில் ஏழு கூறுகள் நீளத்தை எடுத்துக் கொண்டு, அதனுடன் உயரத்தில் பாதியைக் கூட்டினால் கிடைப்பது கர்ணத்தின் நீளம். 4-ஐ எட்டாகப் பிரித்தால் 0.5. அதைக் கழிக்க 4 – 0.5 = 3.5. அதனுடன் உயரத்தில் பாதியை (3/2 = 1.5) கூட்டினால் 3.5 + 1.5 = 5 கிடைப்பது கர்ணம்!

    இது போன்ற கணிதப் பாடல்களின் தொகுப்பு எங்கேனும் உள்ளதா? யாருக்கேனும் விபரம் தெரிந்தால் தெரிவிக்கவும்.

     
    • காஞ்சி ரகுராம் 10:45 பிப on செப்ரெம்பர் 5, 2010 நிரந்தர பந்தம் | மறுமொழி

      ஆஹா, படிச்சாலே மனசு குட்டிக் கர்ணம் அடிக்குது. நண்பர் பாஸ்கரனிடத்திலும் பாடல்களின் தொகுப்பு இல்லையா?! கணிதப் பாடல் புதையலை நம்மில் யாராவது தேட முயற்சிப்போம்.

    • வாணி 6:18 முப on செப்ரெம்பர் 6, 2010 நிரந்தர பந்தம் | மறுமொழி

      பத்தாங்கிளாஸ்ல படித்த தேற்றம் :)))

      நினைவூட்டியமைக்கு நன்றி

    • செ செ 7:28 முப on செப்ரெம்பர் 6, 2010 நிரந்தர பந்தம் | மறுமொழி

      எங்கே தொலைத்தோம் இது போன்ற நம் முன்னோர்களின் கண்டுபிடிப்புகளை..! பெருமையான தகவல். நன்றி. .

      • சத்யராஜ்குமார் 6:30 பிப on செப்ரெம்பர் 28, 2010 நிரந்தர பந்தம் | மறுமொழி

        செ செ, நன்றி. இது போன்ற கணக்கீடுகளை தஞ்சை கோயிலை ஒத்த கோபுரங்களின் கலசங்கள் ஏற்ற மணல் மேடு எவ்வளவு நீளத்திற்கு எழுப்ப வேண்டும் என்பது போன்ற விஷயங்களுக்கு பயன்படுத்தினராம் நமது முன்னோர்கள்.

    • மீனாட்சிசுந்தரம் 9:39 முப on செப்ரெம்பர் 6, 2010 நிரந்தர பந்தம் | மறுமொழி

      கர்ணம் என்ற வார்த்தையே மறந்து போயிருந்தது சத்யராஜ்குமார்.
      சடாரென்று பள்ளிநாட்களை நினைவுகளில் வரச்செய்து விட்டீர்கள்…!

    • பத்மநாபன் 12:54 பிப on செப்ரெம்பர் 6, 2010 நிரந்தர பந்தம் | மறுமொழி

      பிதாகரஸின் செங்கோண முக்கோண சூத்திரம் ஒன்பது ,பத்து வகுப்புகளில் புரிந்தவுடன் கிடைத்த சந்தோசம் இதுவரை கிடைக்கவில்லை …இந்த தேற்றத்தை தவிர அனைத்தும் நினவை விட்டு ஓடி விட்டன . நல்ல பகிர்வு.. கர்ண ப்பாடல் அற்புதம்.. நிச்சயமாக இன்னமும் பாடல்கள் இருக்கும் . தேடிப்பிடிப்போம்.

    • Gowtham 11:28 பிப on செப்ரெம்பர் 6, 2010 நிரந்தர பந்தம் | மறுமொழி

      Thanks for this interesting info… just browsed and stumbled upon this lines…”As a poet, he could not however, resist an urge to write poems with mathematical themes. Two such poems appear in this collection (Math in Matrimony). The best of his effusions on mathematics – “Calculus and Narasimha Avataram” is unfortunately not available. But my brother Rangan (Andy Sundaresan) has succinctly presented the central idea. [12]

      http://www.vindhiya.com/kns/kns_intro_Nannu1-white.html

    • கார்த்திக் 12:46 பிப on செப்ரெம்பர் 7, 2010 நிரந்தர பந்தம் | மறுமொழி

      நம்ம ஊர் கல்வி அமைப்பை இந்த மாதிரி பிரிட்டீஷ் உருவாக்கி சென்று விட்ட பின்பு, நாமும் அப்படியே பின் தொடர்கிறோம்…வரும் சந்ததியாவது மாற வேண்டும்…

      • சத்யராஜ்குமார் 6:36 பிப on செப்ரெம்பர் 28, 2010 நிரந்தர பந்தம் | மறுமொழி

        கார்த்திக், கருத்துக்கு நன்றி. புதியனவற்றை வரவேற்கும் அதே நேரத்தில் பழையனவற்றின் மதிப்பையும் புரிந்து கொண்டு ஏற்றுக் கொள்ளல் பயன் தரும்.

    • RV 3:08 பிப on செப்ரெம்பர் 7, 2010 நிரந்தர பந்தம் | மறுமொழி

      If we rotate the right triangle described here by 90 degrees, then we get a triangle with a base of 3 and height of 4. Applying the formula, hypotenuse is 3 * 7 / 8 + 4/2 = 4.625, which is clearly off. The formula is interesting as a historical and (inaccurate) attempt to estimate the hypotenuse, and not useful mathematically!

    • MOTHILAL 12:14 முப on செப்ரெம்பர் 23, 2010 நிரந்தர பந்தம் | மறுமொழி

      Arumai mega arumai………………………….

    • தகடூர் கோபி 3:07 முப on செப்ரெம்பர் 23, 2010 நிரந்தர பந்தம் | மறுமொழி

      கர்ணம் கண்டுபிடிக்கும் சமன்பாடுகளும் பாடல் விளக்கங்களும் அருமை.

      நான் படித்த காலத்தில் இது போல அருமையாக சொல்லிக் கொடுக்காவிட்டாலும் கணக்கு எனக்கு நன்றாகவே புரிந்தது. அப்போதும் இப்போதும் எனக்கு பிடித்த பாடங்களில் கணக்கும் ஒன்று.

      கர்ணம் என்றால், கணக்கை தப்பாக போடும் போது கணக்கு வாத்தியார் என் காதைப் பிடித்து திருகி தலையில் குட்டியது தான் நினைவுக்கு வருகிறது (கர்ணம் – வடமொழியில் காது)

    • கா. சேது 1:52 பிப on ஒக்ரோபர் 6, 2010 நிரந்தர பந்தம் | மறுமொழி

      எல்லா பொதுவான a, b எண்களுக்கும் இச் சமன்பாடு சரியாகாது.

      காட்டாக a=2, b=1 எனில் c=வர்க்க மூலம் (5) . ஆனால் சமன்பாட்டின் படி c= 2×7/8 + 1/2 = 9/4 = 2.25!
      வர்க்க மூலம் (5) ஆனது வகுபடா எண் (irrational number) = 2.2360…..

      அடுத்ததாக a,b,c மூன்றும் முழு (integer) எண்களாகவும் பைத்தகோரியன் மும்மை (Pythagorean Triple) ஆகவும் இருக்கையிலும் அத்தகைய எல்லா மும்மைகளுக்கும் சமன்பாடு பொருந்தாது. நான் இதை நிறுவிக்காட்டியுள்ளேன் பின்வரும் பக்கத்தில் :

      விகிதம் a/b ஆனது 4/3 அல்லது 12/5 என இருப்பினே c = (a-a/8)+b/2 சமன்பாடு சரியான விடை தருகிறது. – [4,3,5] மற்றும் [12,5,13] ஆகியன. மாற்றாக, [24,7,25] க்கு விடை தவறுகிறது.

      அவ்வாறு சமன்பாடு தரும் தவறான விடைக்கும் சரியான எண்ணிற்கும் உள்ள வேறுபாடு ஒரு மட்டுக்குட்பட்டதா, அதனால் இச் சமன்பாட்டை ஒரு தோராயத்துக்குப் பயன்படுத்தலாமா என்பன பற்றி நான் அலசவில்லை இதுவரை.

      பின்வரும் பக்கங்களில் உள்ள பைத்தகோரியன் மும்மைகளை சோதிதித்துப் பார்க்கலாம்.
      http://en.wikipedia.org/wiki/Pythagorean_triple
      http://www.math.uic.edu/~fields/puzzle/triples.html

      • சத்யராஜ்குமார் 5:40 பிப on ஒக்ரோபர் 7, 2010 நிரந்தர பந்தம் | மறுமொழி

        தங்கள் விளக்கத்துக்கு நன்றி. இந்த முறையின் inaccuracy பற்றி பாஸ்கரனிடம் பேசும் வாய்ப்புக் கிடைத்தால் அவரின் பதிலையும் இங்கு பதிவு செய்கிறேன்.

    • சு. க்ருபா ஷங்கர் 3:37 பிப on ஒக்ரோபர் 11, 2010 நிரந்தர பந்தம் | மறுமொழி

      “ஓடிய நீளந்தன்னை” வாய்ப்பாடு சூப்பரா இருக்கே. என்ன ஒன்னு, இதைப்புரிஞ்சுக்கவாவது பிதாகரஸ் தியரத்தை ஒழுங்கா படிச்சுருக்கலாம் சின்ன வயசுலன்னு தோணுது 😦

    • சத்யராஜ்குமார் 8:21 பிப on ஒக்ரோபர் 13, 2010 நிரந்தர பந்தம் | மறுமொழி

      **** கணிதப் பாடல்கள் – நவீன் குமரன் அனுப்பி வைத்த சுட்டி… ***

      /*இது போன்ற கணிதப் பாடல்களின் தொகுப்பு எங்கேனும் உள்ளதா? யாருக்கேனும் விபரம் தெரிந்தால் தெரிவிக்கவும். */

      கீழ்க்கண்ட சுட்டியில் தாங்கள் கேட்ட அரிய நூலொன்று இருக்கிறது

      http://www.thamizham.net/newunithamizham/jan2009/rare03-u8.htm

      – நவீன் குமரன்

  • மீனாட்சி சுந்தரம் 10:10 am on August 31, 2010 நிரந்தர பந்தம் | மறுமொழி
    Tags: கர்நாடகா, கிராமம், , , , karnataka, village   

    கூகுள் கிராமம் 

    இன்டர்நெட் பற்றியே தெரியாத ஒரு கிராமத்தின் பெயர் “கூகுள்” என்றால் நம்பமுடிகிறதா…?

    கர்நாடகாவின் பெங்களுருவிலிருந்து 510 கிமீ தொலைவில், ரெய்ச்சூர் மாவட்டத்தில் உள்ள ஒரு கிராமம் அது. கிருஷ்ணா நதிக்கரையில் முற்றிலும் விவசாயத்தை நம்பியுள்ள கிராமங்களில் இதுவும் ஒன்று. இதன் மக்கள் தொகை மொத்தமுமே சற்றேறக்குறைய 1000.

    அங்கிருக்கும் பெரியவர்களிடம் உலகின் முன்னணி இணையதள சேவை நிறுவனமான கூகுள் பற்றிச் சொன்னால், அது எங்கள் கிரமத்தின் பெயர் என்கிறார்களாம். கொஞ்சம் விஷயம் தெரிந்தவர்களோ,”எங்கள் கிராமத்தின் பெயரில் ஒரு கம்ப்யூட்டர் கம்பெனி இருப்பதாகக் கேள்விப் பட்டிருக்கிறேன்…” என்கிறார்களாம். இதனால், எங்கள் கிராமத்துக்குப் பெருமை என்றும் ஒன்றிரண்டு பேர் சொல்கிறார்களாம். மற்றவர்களுக்கோ அதுகூடத் தெரியவில்லை.

    அமெரிக்காவின் கலிபோர்னியா ‘மவுண்டன் வியூ’வில் உள்ள கூகுள் இணையசேவை நிறுவனத்திற்குப் பெயர் வைக்க இந்த கிராமம் காரணம் அல்லவென்றாலும், இந்த கிராமத்திற்கு இப்பெயர் வர ஒரு புராணக் கதை இருக்கிறது.

    முன்னம் ஒரு காலத்தில், அல்லம்மா பிரபு என்னும் துறவி ‘பசவ கல்யாண்’ என்னும் இடத்திலிருந்து ஆந்திராவின் ‘ஸ்ரீசைலம்’ செல்லும் போது இந்த கிராமத்தில் தங்கியதால், அவர் தங்கிய குகையை ‘காவி கல்லு’ என்று அழைத்திருக்கிறார்கள். நாளடைவில் அது மருவி கூகல்லு ஆகி, இப்போது ஸ்டைலாக இன்னும் சுருங்கி கூகுள் ஆகிவிட்டதாம்.

    இணைய இணைப்புகள்தான் இல்லை என்றால், கிராமத்தில் எங்கும் ஆங்கிலத்தில்கூட ‘கூகுள்’ இல்லையாம். ஆங்கிலம் கூடாது என மக்கள் போராடியதால், எல்லாப் பெயர்ப் பலகைகளிலும் கன்னடத்தில் மட்டுமே கூகுள் இருப்பதால்… கூகுள் முதலாளியே வந்தால்கூட தனது கம்பெனிப் பெயரை அடையாளம் கண்டுகொள்ளமுடியுமா என்பது சந்தேகமே.

     
    • கார்த்திக் 10:18 முப on ஓகஸ்ட் 31, 2010 நிரந்தர பந்தம் | மறுமொழி

      /// கூகுள் முதலாளியே வந்தால்கூட தனது கம்பெனிப் பெயரை அடையாளம் கண்டுகொள்ளமுடியுமா என்பது சந்தேகமே ///

      :)))

      தெரிஞ்சா, முதலாளி அந்த கிராமத்துக்கு பல மில்லியன் டாலர்கள் கொடுத்தாலும் ஆச்சரியப்படுவதற்கில்லை.

    • C.S.சந்திரசேகர் 9:33 முப on செப்ரெம்பர் 1, 2010 நிரந்தர பந்தம் | மறுமொழி

      இந்த விஷயத்த Google’ ல தேடி புடிச்சீங்களா?

      • மீனாட்சிசுந்தரம் 9:36 முப on செப்ரெம்பர் 6, 2010 நிரந்தர பந்தம் | மறுமொழி

        இல்லை… கர்னாடகாவுல இருக்கையில ஒரு பேப்பர்ல படிச்சேன் சேகர்.

    • காஞ்சி ரகுராம் 11:35 பிப on செப்ரெம்பர் 1, 2010 நிரந்தர பந்தம் | மறுமொழி

      கூகுளாமல் ஒரு நாளும் இருக்க வேண்டா என நம் வாழ்க்கை ஆகி விட்டதால், ஒரு முறையேனும் அந்த கிராமத்திற்க்குச் செல்ல ஆசையாக இருக்கிறது.

    • chollukireen 4:43 முப on நவம்பர் 21, 2011 நிரந்தர பந்தம் | மறுமொழி

      கூகிளுக்கும் அர்த்தம் சொல்லுகிறது.

c
Compose new post
j
Next post/Next comment
k
Previous post/Previous comment
r
மறுமொழி
e
தொகு
o
Show/Hide comments
t
Go to top
l
Go to login
h
Show/Hide help
shift + esc
நிராகரி