Updates from செப்ரெம்பர், 2016 Toggle Comment Threads | விசைப்பலகை சுருக்கவிசைகள்

  • சத்யராஜ்குமார் 9:04 pm on September 27, 2016 நிரந்தர பந்தம் | மறுமொழி  

    கிரந்தம் தவிர்! 2.0 

    ஐந்து வருடங்களூக்கு முன்பு என்னிடமிருந்த புல்வெளி டாட் காம் (http://pulveli.com) என்ற இணைய முகவரியில் கிரந்தம் தவிர்! என்ற தேடுபொறியை என்னாலான சிறு தமிழ்ச் சேவையாக அமைத்துக் கொடுத்தேன்.

    அப்போதே சொன்னது போல ஒரு புனைவு எழுத்தாளனாக முற்றிலுமாக கிரந்தச் சொற்களைத் தவிர்த்து எழுதுவது எனக்கு இயலாத செயலாக இருந்தாலும், தமிழ்க் கட்டுரைகளில், தமிழ் வர்ணனைகளில்  தமிழ்ச் சொற்களை முடிந்த வரை பயன்படுத்த வேண்டும் என்ற எண்ணம் மனதிலிருப்பதே நல்ல விஷயமாகும் என்று நினைக்கிறேன். இது ஆங்கிலச் சொல் கலப்புக்கும் பொருந்தும்.

    சமஸ்கிருதம், ஹிந்தி உட்பட உலகத்தின் எந்த மொழியையும் நான் வெறுப்பவன் அல்ல. கிரந்த எழுத்துக்களைத் தமிழில் இருந்து அகற்ற வேண்டும் என்ற எண்ணம் கொண்டவனும் இல்லை. ஜானி ஜானி யெஸ் பாப்பா என்று உச்சரிக்க ஜா-வும், ஸ்-உம் கை ஒலி கொடுத்தால் வேண்டாமென்றா சொல்லப் போகிறேன்.

    அதே சமயம் பல நேரங்களில் இந்தச் சொல்லுக்கு இணையான தமிழ்ச் சொல் என்ன என்ற தடுமாற்றம் ஏற்படும்போது ஓர் எளிய தேடு கருவி இருந்தால் நன்றாயிருக்குமே என்று எண்ணி உருவாக்கிய இந்தப் பொறி இன்று முதல் புல்வெளி டாட் காம் என்ற முகவரியிலிருந்து  சொல் டாட் புல்வெளி டாட் காம் (http://chol.pulveli.com) என்ற முகவரிக்கு இடம் பெயர்கிறது.

    இக்கருவியின் தொழில்நுட்பப் பங்களிப்பு மட்டுமே என்னுடையது. இதன் ஆன்மா @kryes ஆவார். அதாவது இக்கருவியில் நீங்கள் தேடிப் பெறும் 90 சதவீத சொற்களை உள்ளிட்டிருப்பவர் அவரே. மீதி பத்து சதவீதம் பயனர்கள் அளித்திருக்கிறார்கள். பயனர் தந்த சொற்களை மட்டுறுத்துபவர்கள் @kryes, @arutperungo மற்றும் @madhankrish ஆவார்கள்.

    எல்லோரையும் கிரந்தம் தவிர்க்கச் சொல்லிப் பிரசாரம் செய்வது என் நோக்கம் இல்லை. அது என் வேலையும் இல்லை. ஒரு காலத்தில் தமிழ்க் கதைகளில் ஆங்கிலம் மிகக் கலந்து எழுதி வந்த எனக்கு ஒரு பேட்டியில் சுஜாதா தமிழ்க் கட்டுரை, கதைகளில் முடிந்த வரை நல்ல  தமிழ்ச் சொற்களைப் பயன்படுத்துவதன் அவசியத்தைக் குறிப்பிட்ட பிறகுதான் உறைத்தது. அதன்பின் என்னை மாற்றிக் கொண்டேன். அது மாதிரி எண்ணம் கொண்டவர்களுக்கு இந்தக் கருவி சிறு உதவி செய்யும் என்று நம்புகிறேன்.

    அப்புறம் இன்னொரு முக்கியமான செய்தி. இத்தளத்தை மொபைல் ஃபோனில் படிக்க வசதியாக இப்போது மாற்றி வடிவமைத்திருக்கிறேன். இனி உங்கள் செல்பேசியிலும் இதைப் பயன்படுத்தி மகிழ்க.

    கிரந்தம் தவிர்! புதிய முகவரி குறித்துக் கொள்க!: http://chol.pulveli.com

    5 வருடங்களுக்கு முன்பு கிரந்தம் தவிர்! கருவி உருவான கதை: https://inru.wordpress.com/no-kranth/

    Advertisements
     
  • சத்யராஜ்குமார் 2:15 am on November 19, 2013 நிரந்தர பந்தம் | மறுமொழி  

    தமிழுக்காகத் தவிக்கிறவர்கள்! 

    வாஷிங்டன் டு சான்ஃபிரான்சிஸ்கோ விமானத்தில் ‘ஜாலியா தமிழ் இலக்கணம்’ படித்தேன். இலவசக் கொத்தனார் எழுதிய புத்தகம்.

    படிக்க வேண்டிய லிஸ்ட்டில் ரொம்ப நாளாய் வைத்திருந்த இப்புத்தகத்தை இப்போது எடுக்கக் காரணம் போன வாரம் ஃபேர்ஃபேக்ஸ் தமிழ்ப் பள்ளியில் சந்தித்த நண்பர். அங்கே என் குழந்தைகளை சேர்த்திருப்பது பற்றி ஏற்கெனவே குறிப்பிட்டிருந்தேன். என் மனைவி தன்னார்வத்துடன் அக்குழந்தைகளுக்குப் பாடமும் எடுக்க ஆரம்பித்திருக்கிறார் என்பது உபரி தகவல்.

    பள்ளி நடக்கும் இரண்டு மணி நேர கேப்பில் பள்ளித் திண்ணையில் காத்திருக்கும் அப்பா, அம்மாக்களுடன் பேசும் வாய்ப்பு கிடைக்கிறது. அப்படிப் பழக்கமானவர்தான் முன்னே குறிப்பிட்ட நண்பர்.

    திண்ணை நட்பு ஃபேஸ்புக்கில் நீள, நான் எழுதுபவன் என்றறிந்து தமிழ் பற்றிக் கொஞ்ச நேரம் பேசினார். இங்கிலீஷ் மீடியத்தில் படித்த அவருக்குத் தமிழின் மேல் பேரார்வம். அதன் காரணமாகவே தன் குழந்தையை இங்கே சேர்த்திருக்கிறேன் என்றார்.

    ஆனால் அவருடைய வருத்தம் எல்லாம் படிப்பதும், எழுதுவதும் இப்போது குறைந்து போனதால் தமிழ் கொஞ்சம் கொஞ்சமாய் மறந்து வருவதாக உணர்கிறேன் என்கிறார். முன்பெல்லாம் பிழையான வார்த்தையைப் பார்த்தால் இதில் பிழை உள்ளதென்று ஆணித்தரமாய் சொல்லிவிடக்கூடிய அவருக்கு இப்போது அது பிழைதானா, இல்லை சரிதானா என்ற சந்தேகம் வந்து விடுகிறதாம். இணையத்தில் மட்டுமல்ல பாரம்பரியமிக்க பத்திரிகைகளிலும் ஆங்காங்கே தப்பும் தவறுமாய் எழுதுவதால் எது சரி, எது தப்பு என்ற குழப்ப வைரஸ் அவருக்குள் புகுந்து விட்டது என்றார்.

    ஆங்கிலத்தில் சரளமாகக் கட்டுரை எல்லாம் எழுதுவாராம். தமிழில் எழுத ஆர்வமிருந்தும் தப்பாக எழுதி விடக்கூடாது என்ற பயத்தினால் தயக்கத்துடன் விலகிக் கொள்வதாகச் சொல்கிறார்.

    அவருடைய முக்கியமான குழப்பங்கள் எங்கே க், ச் போன்ற சந்திகள் போட வேண்டும், எங்கே போடக் கூடாது, எங்கே ற வரும், எங்கே ர வரும் போன்றவை. இது நண்பரின் தனிப் பிரச்சனை அல்ல, பொதுப் பிரச்சனை.

    மிகச் சரியாக இந்த மாதிரி விஷயங்களுடன், வலி மிகுதல் (கொஞ்சம் அதிகமாகவே மிகுந்தது), வலி மிகாதிருத்தல், புணர்ச்சி, உருபுகள், குற்றியலுகரம், குற்றியலிகரம், குழூஉக்குறி என்று பல தமிழ் இலக்கண குஜால்களை ஜாலியாக சினிமாப் பாடல்களை உதாரணமாய் வைத்துச் சொல்லிக் கொடுக்கிறது இந்த இலக்கண நூல். கிழக்கு பதிப்பகத்தில் கிடைக்கும் இப்புத்தகத்தை நண்பருக்கும், நண்பரையொத்த தவிப்புடன் இருக்கும் ஏனையோருக்கும் சிபாரிசு செய்கிறேன்.

    புத்தகத்தில் இருக்கும் 99 சதவீத விஷயங்களை அப்படியே ஏற்றுக் கொண்டாலும், ஒன்றிரண்டு விஷயங்களை என்னால் ஏற்றுக் கொள்ள முடியாது என்று சொல்லி விவாதம் எழுப்ப விரும்பவில்லை. ஏனெனில் நான் அவ்வளவு பெரிய இலக்கணப்புலி இல்லை. அப்புறம் புத்தகத்தை எழுதிய இலவசக் கொத்தனார் ஓடோடி வந்து, இந்தக் கட்டுரையிலேயே கூட பதினேழு பிழைகளைக் கண்டுபிடித்துச் சொல்லுவார்.

    • சத்யராஜ்குமார்
     
  • சத்யராஜ்குமார் 8:55 pm on August 28, 2011 நிரந்தர பந்தம் | மறுமொழி
    Tags: கிரந்தம்   

    கிரந்தம் தவிர்! 

    சமீபத்தில் கிரந்தம் தவிர்த்து எழுதுவது குறித்த விவாதத்தை ட்விட்டரில் படிக்க நேர்ந்தது. ஒரு புனைவு எழுத்தாளனாக எழுத்தில் முற்றிலுமாக கிரந்தம் தவிர்ப்பது இயலாது என்பது எனது தனிப்பட்ட கருத்து. அதற்கு கிரந்த வார்த்தைகள் சொற்கள் முதலில் சமூகத்திலிருந்து முற்றிலுமாக வெளியேற வேண்டும். இது ஒரு பிடி இருபத்தியிரண்டு நிலைமை.

    ஆனால், நாற்பது ஐம்பது வருடங்களுக்கு முந்தைய செய்தித்தாளில் சுருட்டித் தரப்பட்ட சுண்டலோ, பஜ்ஜியோ சாப்பிட நேர்ந்தால் – அப்போதிருந்த எத்தனையோ கிரந்தச் சொற்கள் இப்போது வழக்கொழிந்து போயிருப்பதை உணரலாம். எப்படி இது நிகழ்ந்தது? இது குறித்த ப்ரக்ஞை சிந்தனை மிகுந்தவர்கள் பேசும்போதும், எழுதும்போதும் வடிகட்டிய தமிழ் வார்த்தைகளை சொற்களை தொடர்ந்து உபயோகித்து பயன்படுத்தி வந்திருக்க வேண்டும்.

    ஆக முடிந்த வரை கிரந்தம் தவிர்ப்பதன் மூலம் ஓரளவு தமிழ் சுத்திகரிக்க்ப்படும் வாய்ப்புள்ளது என்று தெரிகிறது. ஆனால் கிரந்தம் தவிர்ப்பதில் உள்ள பிரதான தலையாய சிக்கல், தகுந்த மாற்றுச் சொற்களைப் பிரயோகித்து பயன்படுத்தி எழுதும் அளவு மொழி வளம் எல்லோருக்கும் இல்லை என்பதே ஆகும். அதற்குக் காரணம் மொழி அருவியாய்க் கொட்டும் சங்க இலக்கிய தமிழ் பொக்கிஷங்களை கருவூலங்களை ஆற அமர படித்து ரசிக்க தற்கால சந்ததியினர்க்கு பொறுமையில்லை அல்லது நேரமில்லை.

    இது தமிழ் படிக்க மட்டுமில்லை; எல்லா துறைகளுக்கும் பொருந்தும். அதனால்தான் இணையத்தில் இன்று எல்லாமே கூட்டு முயற்சியில் நடைபெறுகின்றன. எனக்குத் தெரிந்ததை நான் சொல்கிறேன். உனக்குத் தெரிந்ததை நீ சொல்லு. இணைந்து அறிவு பெறுவோம். இணைந்து செயல்படுவோம்.

    அப்படித்தான் @kryes கிரந்தம் தவிர்க்க ட்விட்டரில் தினம் ஒரு சொல்லை இட ஆரம்பித்தார். படிக்க சுவாரஸ்யமாக ஆர்வமூட்டுவதாக இருந்தது. ஆனாலும் அவை ட்விட்டரின் நேரச் சுழலில் புதைந்து மறைந்து விடுவதைப் பார்த்து மெலிதான கவலை பிறந்தது.

    நினைத்த போது ஒரு கிரந்தச் சொல்லை உள்ளிட்டு அதற்கு இணையான தமிழ்ச் சொல்லைக் கண்டறியும் வசதி வேண்டும் என எண்ணினேன். அப்படி ஒன்று ஏற்கெனவே இருக்கிறதா என்று தேடிப்பார்த்துக் கிடைக்காததால், நாள்தோறும் அலுவலகத்துக்கு பஸ்ஸில் பேருந்தில் செல்லும் நேரத்தில் இந்த எளிய கருவியை உருவாக்கி – புல்வெளி.காம் தளத்தில் வெளியிட்டுள்ளேன்.

    @kryes இக்கருவி குறித்து பல யோசனைகளை சிந்தனைகளை வழங்கியுள்ளார். தினம் ஒரு சொல்லை இதில் இணைக்க தான் உதவ முடியுமென நம்பிக்கை தெரிவித்திருக்கிறார். @raghuji தளத்துக்கான தோற்றம், வடிவமைப்பில் தனது உதவிக்கரம் நீட்டினார்.

    தளத்தில் இதுகாறும் இல்லாத சொல்லுக்கு இணையான தமிழ்ச் சொல் உங்களுக்குத் தெரியுமெனில் அதை நீங்களே இணைக்கவும் வழியுண்டு. அடுத்த முறை நீங்கள் ஒரு பதிவு எழுதும்போது கிரந்த வார்த்தை உங்கள் எழுத்தில் வந்து விழுந்தால் அதற்கு மாற்று உண்டா என இங்கே ஒரு எட்டு வந்து பார்க்கலாம்.

     
    • TPKD / TBCD (@TPKD_) 10:03 பிப on ஓகஸ்ட் 28, 2011 நிரந்தர பந்தம் | மறுமொழி

      அருமையான முயற்சி..பாராட்டுகள்…வாழ்த்துகள்.

      இது கிரந்தம் இல்லாத வடமொழிச்சொற்களுக்கும் நீட்டித்தால் நன்றாக இருக்குமென்று நினைக்கிறேன் :-))

    • amas32 10:43 பிப on ஓகஸ்ட் 28, 2011 நிரந்தர பந்தம் | மறுமொழி

      நல்ல முயற்சி, வாழ்த்துக்கள்!
      amas32

    • PADMANABAN 11:37 பிப on ஓகஸ்ட் 28, 2011 நிரந்தர பந்தம் | மறுமொழி

      நல்ல பதிவு சத்யா…பெயர்ச் சொல் தவிர மற்ற இடங்களில் கிரந்தம் தவிர்க்கலாம் …. முயற்சி திரு வினையாக்கும்… கிரந்தம் தாண்டி விடலாம் அடுத்து ஆங்கில கலப்புக்கு என்ன செய்வது…..

    • Ravi 12:03 முப on ஓகஸ்ட் 29, 2011 நிரந்தர பந்தம் | மறுமொழி

      நல்ல முயற்சி. நானும் சில சொற்களைச் சேர்க்கத் தொடங்கி இருக்கிறேன்.

    • Balaraman 1:20 முப on ஓகஸ்ட் 29, 2011 நிரந்தர பந்தம் | மறுமொழி

      மிகவும் நல்ல முயற்சி! 🙂

      இந்தப் பதிவில் கீழ்க்கண்ட சொற்களையும் ‘அடித்து’ நொறுக்கவும்:

      ரசிக்க – விரும்ப
      யோசனைகளை – சிந்தனைகளை

      அப்புறம் ‘பஜ்ஜியோ’ என்பதை ‘பஃச்சியோ’ என்று எழுத ஊக்குவிக்கலாமா?!

      நானும் ‘புல்வெளி’யில் என்னால் முடிந்ததைச் செய்கிறேன், நன்றி!

    • சத்யராஜ்குமார் 6:08 முப on ஓகஸ்ட் 29, 2011 நிரந்தர பந்தம் | மறுமொழி

      @TPKD_ , amas32, PADMANABAN, Ravi, Balaraman உங்கள் ஆலோசனைகளுக்கும், வாழ்த்துக்கும் மிக்க நன்றி.

    • Kannabiran Ravi Shankar (KRS) 8:46 முப on ஓகஸ்ட் 29, 2011 நிரந்தர பந்தம் | மறுமொழி

      //ஒரு புனைவு எழுத்தாளனாக எழுத்தில் முற்றிலுமாக கிரந்தம் தவிர்ப்பது இயலாது என்பது எனது தனிப்பட்ட கருத்து//

      🙂
      ஓரளவு உண்மையே!
      முற்றிலும் தவிர்ப்பதற்குப் பதிலாக, இயன்ற வரை தவிர்க்க முனைவோம்! இதனால் நல்ல தமிழ்ச் சொற்கள் வழக்கொழியாமல் நிலைக்கும்!

      @ksrk & @raghuji – இந்தப் பணிக்கு என் மிகுந்த நன்றி!

      @TPKD_ , amas32, PADMANABAN, Ravi, Balaraman – உங்களால் இயன்ற அளவு சொற்களைச் சேருங்கள்! நண்பர்களிடையேயும் அறிமுகம் செய்யுங்கள்!

    • elavasam 9:27 முப on ஓகஸ்ட் 29, 2011 நிரந்தர பந்தம் | மறுமொழி

      சிந்தனை என்பதை யோசனை என்ற சொல்லின் மாற்றாக எடுத்துக் கொள்ள முடியவில்லை. சிந்தனை = thought, யோசனை = suggestion / idea இல்லையா?

      • சத்யராஜ்குமார் 10:07 முப on ஓகஸ்ட் 29, 2011 நிரந்தர பந்தம் | மறுமொழி

        பலராமனின் பின்னூட்டத்துக்குப் பின் மாற்றினேன். யோசனைக்கு உரிய மாற்றுச் சொல் யாரேனும் வழங்க வேண்டும்.

      • Kannabiran Ravi Shankar (KRS) 10:55 முப on ஓகஸ்ட் 29, 2011 நிரந்தர பந்தம் | மறுமொழி

        @elavasam
        யோசனை என்பதே தமிழ்ச் சொல் தான்! – ‘வழாமை ஓடி யோசனை நீண்டு மாலை வேய்ந்து’ என்பது மணிமேகலை!

        யோசிக்கிறேன் = thought! யோசனை சொல்=suggestion! works both ways!
        சிந்தனை= always, thought

      • C.R. Selvakumar 10:07 முப on நவம்பர் 27, 2013 நிரந்தர பந்தம் | மறுமொழி

        யோசனை என்பதற்கு ஈடாக கருத்து அல்லது கருத்தூட்டு என்று சொல்லலாம். ஒரு யோசனை வந்தது என்பதை ஒரு கருத்து தோன்றியது என்று சொல்லலாம். ஆ! அது நல்ல யோசனை என்பதை ஆ! அது நல்ல கருத்தாச்சே என்று சொல்லலாம். suggestion என்றால் பரிந்துரை, கருத்தூட்டு என்று சொல்லலாம். யோசனை என்பதையோ அது போன்ற சொற்களை நீக்கவேண்டும் என்பதையோ கருத்தாகக் கொள்ளவேண்டாம் என்பது என் தனிக்கருத்து. வாடிக்கை, அலமாரி முதலான சொற்களும் தமிழ் அல்ல. ஆனால் தமிழாக உள்வாங்கி ஆளலாம். மிக அதிகமாக வேற்றுமொழிச்சொற்கள் பெருகிப் போனால் தான் சிக்கல். ஆனாலும் ஈடான தமிழ்ச்சொற்களை ஆங்காங்கே ஆள்வதும் நல்லது. புனை கதைகள் வேறு கட்டுரை, புனைவிலா எழுத்துகள் வேறு.

    • ila 9:46 முப on ஓகஸ்ட் 29, 2011 நிரந்தர பந்தம் | மறுமொழி

      அருமையான முயற்சிங்க. சில வார்த்தைகளை சொற்களை இணைத்துள்ளேன். அதே மாதிரி அதை நிர்வகிக்கவும் ஒரு குழு அமைச்சிருங்க. டேமிளர்ஸ் ஆர் சோ கன்னிங் பெல்லோஸ் யூ நோ..

    • seenu 11:02 முப on ஓகஸ்ட் 29, 2011 நிரந்தர பந்தம் | மறுமொழி

      நல்ல முயற்சி.வாழ்த்துக்கள்.நன்றியுடன்
      சீனு

    • இரா. செல்வராசு 6:57 பிப on ஓகஸ்ட் 29, 2011 நிரந்தர பந்தம் | மறுமொழி

      நல்ல முயற்சி. தள வடிவமைப்பும் மிகவும் அழகாகவும் எளிமையாகவும் இருக்கிறது.

    • REKHA RAGHAVAN 5:07 முப on ஓகஸ்ட் 30, 2011 நிரந்தர பந்தம் | மறுமொழி

      நல்ல முயற்சி. வாழ்த்துகள்.

    • Bar-Code 11:55 முப on ஓகஸ்ட் 31, 2011 நிரந்தர பந்தம் | மறுமொழி

      உங்கள் முயற்சிக்கு வாழ்த்துக்கள் சத்யா

    • blog.indian 1:25 பிப on திசெம்பர் 4, 2011 நிரந்தர பந்தம் | மறுமொழி

      திரு. இராம.கி அவர்களின் வளவு பதிவில் உள்ள சொல்லாக்கங்களின் தொகுப்பு.

      http://thamizhchol.blogspot.com/

      • Kannabiran Ravi Shankar (KRS) 8:36 பிப on திசெம்பர் 9, 2011 நிரந்தர பந்தம் | மறுமொழி

        மிக்க நன்றி; இராம.கி ஐயாவின் செஞ்சொல்லாக்கங்களின் நனி மகிழ்நன் நான்! அவரை அறிந்தவனும் ஆதலால்…இத்தளம் கண்டு பெரிதும் மகிழ்ந்தேன்!

    • blog.indian 1:29 பிப on திசெம்பர் 4, 2011 நிரந்தர பந்தம் | மறுமொழி

      ஹஸ்தம் = கைத்த(ல)ம் 

      சுவாரஸ்யம் = சுவையாரம் 

      புஸ்தகம் = பொத்தகம்

      ஜோடி = சோடி

    • Krishnan 11:56 பிப on நவம்பர் 13, 2013 நிரந்தர பந்தம் | மறுமொழி

      நல்ல முயற்சி. வாழ்த்துக்கள்..நானும் கிரந்த சொற்களை பயன்பாட்டில் இருந்து தவிர்க்க முயல்வேன்.

    • Krishnan 11:56 பிப on நவம்பர் 13, 2013 நிரந்தர பந்தம் | மறுமொழி

      Reblogged this on My Perspectives and commented:
      கிரந்தம் தவிர்.

    • C.R. Selvakumar 10:09 முப on நவம்பர் 27, 2013 நிரந்தர பந்தம் | மறுமொழி

      மிக நல்ல முயற்சி! நல்வாழ்த்துகள்!

c
Compose new post
j
Next post/Next comment
k
Previous post/Previous comment
r
மறுமொழி
e
தொகு
o
Show/Hide comments
t
Go to top
l
Go to login
h
Show/Hide help
shift + esc
நிராகரி